O Máster en Políticas Sociais e Intervención Sociocomunitaria (MOPS) oriéntase cara ás políticas sociais, a exclusión social e a intervención social e comunitaria. A titulación nace da necesidade emerxente da demanda de cualificación profesional, pero tamén de actualización de coñecementos por parte do ámbito académico-científico, que permitan a actuación ante as problemáticas sociais emerxentes na actualidade. O Máster está enfocado cara ao amplo colectivo de alumnado egresado principalmente dos ámbitos da Socioloxía, a Ciencia Política, a Economía, a Educación Social e o Traballo Social, ao mesmo tempo resulta de interese para titulados/as doutras disciplinas, principalmente do ámbito das Ciencias Sociais e Xurídicas. O MOPS ten unha duración de dous cursos académicos. Durante o primeiro curso ofrécese unha formación especializada en políticas sociais, procesos de exclusión e intervención sociocomunitaria con materias de contido teórico-práctico e metodolóxico. Durante o segundo curso, o alumnado deberá escoller unha especialidade: Migracións, Xénero, ou Envellecemento e transformacións familiares. O proceso formativo culmina coa realización das prácticas e do Traballo Fin de Máster (TFM).